रोयल फेमिलीले जित्यो मालिकादेवी कप 

चाैतारा-तेस्रो संस्करणको मालिकादेवी कप फुटबल प्रतियोगिताको उपाधिका रोयल फेमिली चौताराले जितेको छ ।

चौतारा साँगाचोकगढी नगरपालिका–७ मेलचौरस्थित दरबारडाँडा मैदानमा शुक्रबार सम्पन्न फाइनल खेलमा महांकालभूमि तामाङ समाज साँगाचोकलाई ०–२ गोलले पराजित गर्दै रोयल फेमिली प्रतियोगिताको बिजेता बनेको हो ।

रोयल फेमिलीको जितमा उमेर समूहमा नेपालको प्रतिनिधित्व गरिसकेका कृष सापकोटाको नायककीय प्रदर्शन गरे । पहिलो र दोस्रो हाफमा समान एक–एक गोल गरेका सापकोटा नै खेलको म्यान अफ द म्याच घोषित भए । रोयलले अधिकांश समय बल नियन्त्रणमा लिएर लगातार आक्रमणमा उत्रेपछि महांकालभूमि निरीह बन्दा उपबिजेतामा चित्त बुझाउन बाध्य भयो ।

  मेलचौर युवा जागरण समाजले आयोजना गरेको प्रतियोगिताको बिजेता रोयल फेमिलीले मालिकादेवी कपसहित नगद १ लाख ११ हजार १ सय रुपैयाँ पुरस्कार पायो ।  उपबिजेता महांकालभूमिले नगद ६६ हजार ६ सय ६६ रुपैयाँ हात पा¥यो ।

रोयल फेमिलीका विदेशी खेलाडी एलेक्स उत्कृष्ट स्ट्राइकर,  रोनिश श्रेष्ठ सर्वाधिक गोलकर्ता र निर्मल श्रेष्ठले उत्कृष्ट प्रक्षिकको उपाधि जित्दा महांकालभूमिका राम ढकाल उत्कृष्ट मिडफिल्डर, सहज कोइराला उत्कृष्ट गोलरक्षक र बिलभ तामाङ उत्कृष्ट डिफेण्डर घोषित भए । उत्कृष्ट खेलाडीले ट्रफी र नगद ३ हजार रुपैयाँ पुरस्कार पाए । चौतारा फाइभ युथ क्लबले फेयर प्लेको अवार्ड जित्यो । उसले ट्रफीको साथमा नगद ५ हजार रुपैयाँ पुरस्कार पायो ।

बिजेता टोली तथा खेलाडीलाई बागमती प्रदेश सरकारका भौतिक योजनामन्त्री युवराज दुलाल, चौतारा साँगाचोकगढी नगरपालिकाकी उपप्रमुख सीता थापा लगायतले संयूक्त रुपमा ट्रफी, मेडल, प्रमाणपत्र र नगद पुरस्कार बितरण गरे ।

सातासम्म चलेको खुला ७ए साइड नगर कप प्रतियोगितामा बाह्यसहित जिल्लाका २९ टोलीले भाग लिएका थिए । जागरण समाजले बिजया दशमी तथा शुभ दिपावलीको अवसरमा बर्सेनी यो प्रतियोगिता आयोजना गर्दै आएको छ । आयोजकले बर्सेनी पुरस्कार राशी र सहभागी टोली बढाउँदा रोमाञ्चक बन्दै गएको यो प्रतियोगिता जिल्लामै चर्चित छ । ‘जिल्लामै प्रतिष्ठित बनिरहेको प्रतियोगितालाई निरन्तरता दिनेछौँ,’ आयोजक जागरण समाजको अध्यक्ष कृष्ण श्रेष्ठले भने ।