आइपिएल : कराेडमा बिकेका आठ युवा क्रिकेटर
चाैतारा-आइपिएएल २०२४ का लागि भएको खेलाडी अक्सनको पहिलो दिन धेरै खेलाडीका लागि धनको वर्षा भयो।
अस्ट्रेलियाका मिचेल स्टार्क आइपिएलको इतिहासकै सबैभन्दा महँगा खेलाडी बने। मिचेललाई कोलकाता नाइट राइडर्सले २४.७५ करोड भारुमा किन्यो।
प्याट कमिन्सलाई सनराइजर्स हैदरावादले २० करोड ५० करोडमा आबद्ध गर्यो।
यी महँगो बोलीको बीचमा, केहि युवा खेलाडी अक्सनदेखि नै चर्चामा रहे।
मंगलबार दुबईमा भएको अक्सनमा केही भारतीय अनक्याप्ड क्रिकेटरहरू करोडौं रुपमा टिममा आबद्ध हुन सफल भए।
अनक्याप्ड क्रिकेटर भन्नाले भारतीय टोलीका लागि अहिलेसम्म कुनै खेल नखेल्ने खेलाडीहरू हुन्।
समीर रिजवी
उनी एक अनक्याप्ड भारतीय खेलाडी हुन्। समीरको अक्सन २० लाखको न्यूनतम मूल्यबाट सुरु भएको थियो।
चेन्नई सुपर किंग्स र गुजरात टाइटन्सबीच समीरलाई किन्नको लागि राम्रो बोली लगाउने दौड सुरु भयो। यस दौडले अन्तिम रेखा छोएपछि २० लाखको लिलामी ८.४० करोड पुगेको थियो। चेन्नई सुपर किंग्सले समीरलाई ८ करोड ४० भारु लाखमा किन्यो।
आइपिएल अक्सनअघि समीर यूपी टी–२० लिगमा उत्कृष्ट प्रदर्शनका कारण चर्चामा आएका थिए। लिगमा समीरले १० खेलमा ५० भन्दा बढीको औसतमा ४५५ रन बनाएका थिए। प्रतियोगितामा सर्वाधिक रन बनाउने कीर्तिमान पनि समीरको नाममा छ।
२० वर्षीय समीर उत्तर प्रदेशको मेरठका हुन्। समीरले यूपी टी–२० लिगमा कानपुर सुपरस्टार्सका लागि सर्वाधिक छक्का प्रहार गरेका थिए। यस लिगमा समीरले दुई शतक र फाइनल खेलमा ५० बलमा ८४ रन बनाएका थिए। यही इनिङ्सका कारण समीरको टोली प्रतियोगिताको उपाधि जित्न सफल भयो।
अण्डर-२३ मा समेत समीरले राजस्थानविरुद्धको एकदिवसीय खेलमा ६५ बलमा ९१ रन बनाएका थिए। समीरका मामा तान्किब अख्तर पनि क्रिकेटर बन्न चाहन्थे तर उनको सपना पूरा हुन सकेन, त्यसैले उनले आफ्नो भान्जाको खेलकुदमा आफ्नो सपना बुन्न थाले।
समीरले इन्डियन एक्सप्रेससँग भनेका छन्, ‘मामु सधैं मेरो साथमा हुनुहुन्थ्यो। बितेको १४ वर्षमा मामा मसँगै मैदानमा नहुदाका १४ दिन मलाई पनि याद छैन।’
समीरका बुवा हसीन रिजवीले आफ्नो तान्किबलाई घर आउनबाट रोकेका थिए।
रोहित शर्मालाई आफ्नो नायक मान्ने समीर भन्छन्, ‘मेरो मामालाई मभन्दा बढी विश्वास थियो। उहाँले मलाई जबरजस्ती बस्न लगाउनुभयो र अक्सन हेर्न लगाउनुभयो। म हेर्न चाहन्न थिए, तर उहाँले मलाई हेर्न लगाउनुभयो। म यो हेर्न सक्षम भएकोमा खुसी छु।’
समीरका मामा तान्किब भन्छन्- ‘यो उमेरमा यति धेरै पैसा… मलाई अलिकति डर लागिरहेको छ। प्रशिक्षकको रूपमा मेरो भूमिका सकिएको छ। अब उसले राम्रो प्रशिक्षक पाउनेछ।’
शाहरुख खान
मंगलबार दुबईमा जब अक्सन सुरु भयो, तब शाहरुखले पनि आफू यति धेरै पैसामा आबद्ध हुने अनुमान गरेका थिएनन्।
गुजरात टाइटन्सले शाहरुखलाई ७.४० करोडमा किन्यो। शाहरुखको न्यूनतम मूल्य ४० लाख थियो।
शाहरुख यसअघि पनि आइपिएल खेलिसकेका छन् र अहिले करोड रुपैयाँमा आबद्ध भएका कारण चर्चामा आएका छन्।
तमिलनाडुका ब्याट्सम्यान शाहरुखलाई २०२१ मा किंग्स इलेभेन पञ्जाबले ५.२५ करोडमा किनेको थियो। जुनियर लेभलमा स्विमिङ च्याम्पियन बनेका शाहरुख खानको नाम फिल्म स्टार शाहरुख खानको नाममा राखिएको थियो। यद्यपि शाहरुख रजनीकान्तका फ्यान हुन् ।
सन् १९९५ मा चेन्नईमा जन्मेका शाहरुख खानका पिता मसूद पनि क्लब क्रिकेटर हुन् अहिले छालाको व्यवसायमा छन्। उनकी आमा लुब्ना चेन्नईमा बुटिक चलाउछिन्। शाहरुख मिडल अर्डरमा आक्रामक खेल्नका गर्नका लागि परिचित छन्।
शाहरुख पहिलो पटक सन् २०१२ मा चर्चामा आए, जब उनले जुनियर चेन्नई सुपर किंग्स प्रतियोगितामा आफ्नो क्षमता देखाए।
शाहरुखले १८ वर्षको उमेरमा सैयद मुश्ताक अली ट्रफीमा तमिलनाडुका लागि आफ्नो पहिलो टी-२० खेल खेलेका थिए। सन् २०१४ मा भएको प्रतियोगिताको आफ्नो पहिलो खेलमा शाहरुखले गोवा विरुद्ध मात्र ८ बलमा २१ रन बनाएका थिए ।
रोबिन मिन्ज
आदिवासी खेलाडी रोबिन मिन्जलाई आइपिएल २०२४ को अक्सनमा गुजरात टाइटन्सले ३.६ करोड भारुमा किन्यो। २१ वर्षीय रोबिन मिन्जको न्यूनतम मूल्य २० लाख रुपैयाँ थियो। रोबिनमा धेरै टोलीले चासो देखाए तर अन्त्यमा उनी गुजरातमा आबद्ध हुन सफल भए।
रोबिन झारखण्डका हुन्। उनी बायाँ हाते ब्याट्सम्यान रोबिन महेन्द्रसिंह धोनीका फ्यान हुन्। धोनीले जस्तै रोबिनले पनि अनुभवी प्रशिक्षक चञ्चल भट्टाचार्यबाट प्रशिक्षण लिएका हुन्।
उनी झारखण्डको गुम्ला जिल्लाका हुन्। हाल उनी राँचीमा बस्छन्। तर अहिलेसम्म उनले रणजी ट्रफीमा आफ्नो टिमबाट खेल्न सकेका छैनन्। तर, रोबिन झारखण्डको अन्डर-१९ र अन्डर-२५ टोलीको हिस्सा भइसकेका छन्।
एनडीटीभी स्पोर्ट्सको रिपोर्टका अनुसार रोबिनका बुबाले सेनामा सेवा गरेका छन् र सेवानिवृत्त भएपछि आजकल राँचीको एयरपोर्टमा गार्डको रूपमा काम गर्छन्।
उनले मुम्बई इन्डियन्स, लखनऊ सुपरजायन्ट्स, दिल्ली क्यापिटल्स, कोलकाता नाइट राइडर्ससँग ट्रायल दिएका थिए। तर, २०२३ को आइपिएल लिलामीमा रोबिनलाई कुनै पनि आबद्ध गरेनन्।
कुमार कुशाग्र
रोबिन जस्तै कुमार कुशाग्रा पनि झारखण्डका हुन्। दिल्ली क्यापिटल्सले कुशाग्रालाई ७.२० करोड भारुमा किन्यो। कुमार कुशाग्रालाई किन्न चाहने चेन्नई सुपर किंग्स र गुजरात टाइटन्स पनि थिए।
हालै विजय हजारे ट्रफीमा झारखण्डको जितमा कुमारले महत्वपूर्ण भूमिका खेलेका थिए।
१९ वर्षीय कुशाग्र यस वर्षको देवधर ट्रफीमा आफ्नो ब्याटिङका कारण चर्चामा थिए। पाँच इनिङ्समा कुशाग्रले १०९ को स्ट्राइक रेटमा २२७ रन बनाएका थिए। विजय हजारे ट्रफीमा कुशाग्राले ३७ बलमा ६७ रन बनाएका थिए। कुशाग्र २०२० को अन्डर-१९ विश्वकपको टोलीमा भारतीय टोलीका सदस्य थिए। २०२२ मा कुशाग्राले नागाल्याण्डविरुद्ध दोहोरो शतक बनाएका थिए। कुशाग्रले १७ वर्षको उमेरमा यो उपलब्धि हासिल गरेका थिए ।
शुभम दुबे
शुभम दुबेको ५.८ करोड भारुमा राजस्थान रोयल्समा आबद्ध भए। राजस्थानले दिल्ली क्यापिटल्सलाई पछि पार्दै शुभमलाई आफ्नो टोलीमा समावेश गर्यो। सैयद मुश्ताक अली ट्रफीमा शुभम दुबेले सात इनिङ्समा २२१ रन बनाएका थिए। २९ वर्षीय शुभम नागपुरका हुन्।
इन्डियन एक्सप्रेससँग कुरा गर्दै शुभम दुबे भन्छन्, ‘मैले टी–२० मा सैयद मुश्ताक अली राम्रो खेलेको थिएँ, त्यसैले म छनोट हुनेमा आशावादी थिएँ। तर यति ठूलो रकम आउनेछ, करोडौं पाउँछु भनेर सोचेको पनि थिइनँ। अब मेरो जिम्मेवारी अझ बढेको छ।
इन्डियन एक्सप्रेसको रिपोर्टअनुसार शुभमका बुबा वर्षौंदेखि बेरोजगार छन्। शुभमका भाइ निजी कम्पनीमा काम गर्छन्। शुभमलाई आशा छ कि आइपिएलबाट प्राप्त पैसाले उनको जीवन परिवर्तन हुनेछ।
शुभम भन्छन्- ‘मेरो बुवा लामो समयदेखि कामविहीन हुनुहुन्छ। हामीले धेरै नराम्रो समय देख्यौं। बुबा कहिले यता, कहिले उता काम गर्नुहुन्थ्यो। मसँग पन्जा किन्न पैसा थिएन। मलाई सहयोग गर्ने प्रशिक्षक सुजित जैसवाल हुन्।’
यश दयाल
रोयल च्यालेन्जर्स बैंगलोरले यश दयाललाई ५ करोड भारुमा किन्यो। २६ वर्षीय यश इलाहाबादका हुन् र देब्रे हात मध्यम गतिमा बलिङ गर्छन्। यश दयालले २०१८ मा प्रथम श्रेणी खेलबाट डेब्यु गरेका थिए। यशले १७ प्रथम श्रेणी खेलमा ५८ विकेट र ४२ टी–२० खेलमा ३८ विकेट लिएका छन्।
एम सिद्धार्थ
तमिलनाडुका स्पिनर एम सिद्धार्थलाई लखनउ सुपर जायन्ट्सले २.४ करोड भारुमा किन्यो। आरसीबी टोलीले पनि सिद्धार्थलाई किन्न चासो देखाएको थियो तर लखनउको टोली अगाडि रह्यो।
सिद्धार्थको न्यूनतम मूल्य २० लाख रुपैयाँ थियो। सन् १९९८ मा जन्मेका सिद्धार्थले सात टी–२० खेलमा १८ विकेट लिएका छन्। उनले अहिलेसम्म प्रथम श्रेणी क्रिकेटका ७ खेलमा २७ विकेट लिएका छन्।
सुशान्त मिश्रा
मंगलबार सुशान्तका लागि विशेष बन्यो। भारतको यू-१९ टिमका खेलाडी सुशान्तलाई गुजरात टाइटन्सले २ करोड २० लाख भारुमा किन्यो। सनराइजर्स हैदरावादले पनि सुशान्तलाई किन्ने प्रयास गरेको थियो।
सुशान्त सन् २०२२ मा सनराइजर्स हैदरावादको टोलीमा थिए। २२ वर्षीय सुशान्त राँचीका हुन्। सुशान्तले सात प्रथम श्रेणी खेलमा २० विकेट लिएका छन् ।
को हुन् सबैभन्दा महँगा खेलाडी ?
मिचेल स्टार्क, कोलकाता नाइट राइडर्स – २४.७५ करोड भारु
प्याट कमिन्स, सनराइजर्स हैदरावाद – २०.५० करोड भारु
ड्यारल मिचेल, चेन्नई सुपर किंग्स – १४ करोड भारु
हर्षल पटेल, पञ्जाब किंग्स – ११.७५ करोड भारु
अल्जारी जोसेफ, रोयल च्यालेन्जर्स बैंगलोर – ११.५० करोड भारु
स्पेन्सर जोन्सन, गुजरात टाइटन्स – १० करोड भारु
समीर रिजवी, चेन्नई सुपर किंग्स – ८.४० करोड भारु
रोवमान पावेल, राजस्थान रोयल्स – ७.४० करोड भारु
शाहरुख खान, गुजरात टाइटन्स – ७.४० करोड भारु
कुमार कुशाग्रा, दिल्ली क्यापिटल्स – ७.२ करोड भारु
-बीबीसी हिन्दीबाट