२५ देखि ३० हजार स्वास्थ्यकर्मीको दरबन्दी थप्दै छौँ–मन्त्री बस्नेत
चाैतारा-स्वास्थ्य तथा जनसंख्यामन्त्री मोहनबहादुर बस्नेतले गुणस्तरीय स्वास्थ्य सेवा प्रवाह गर्न स्वास्थ्यकर्मीको दरबन्दी बढाउने प्रक्रियाको थालनी गरेको बताएका छन् ।
चौतारा साँगाचोकगढी नगरपालिका–८ स्थित ईर्खु माविको ६४ औँ वार्षिकोत्सवको मंगलबार उद्घाटन गर्दै उनले स्वास्थ्य क्षेत्रमा फटाफट काम गर्ने बातावरणको निर्माणमा आफू जुटिरहेको बताए ।
२०५४ देखि स्वास्थ्य संस्थामा दरबन्दी बढ्न नसकेको उल्लेख गर्दै मन्त्री बस्नेतले भने, ‘तत्काल २५ देखि ३० हजार दरबन्दी बढाउने गरी मन्त्रालयले प्रक्रिया थालिसकेको छ ।’ समयअनुसार स्वास्थ्यकर्मीको दरबन्दी बढ्न नसक्दा गुणस्तरीय सेवा प्रवाहमा बाधा पु¥याइरहेको उनको भनाइ छ ।
गरिबीका कारण आर्थिक अभावमा उपचार नपाएर मर्नुपर्ने बाध्यताको अन्त्य गर्ने गरी स्वास्थ्य क्षेत्रमा व्यापक परिवर्तन गर्नुपर्ने आवश्यकता देखिएको अनुभव मन्त्री बस्नेतले सुनाए । ‘अब पनि पैसा नभएर उपचार नपाइ मर्नुपर्ने अवस्था रहनु लज्जाको विषय हो,’ यसलाई अन्त्य गर्ने गरी आफूले काम गर्ने प्रतिवद्धता जनाउँदै उनले भने ।
चिकित्सा शिक्षामा सुधारको आवश्यकता औँल्याउँदै बस्नेतले स्वदेशमै पढ्ने बतावरण बनाउने प्रयास भइरहेको बताए । उनले थपे, ‘चिकित्सा शिक्षा अध्ययनमा अर्बौँ रुपैयाँ विदेशिने गरेको छ । स्वदेशमै पढ्ने बातावरण बनाउन सके यसलाई रोक्न सकिन्छ ।’
