चौतारा नगरले किन्छ, किसानका तरकारी
चाैतारा-तरकारी फलाउने चौतारा साँगाचोकगढी नगरपालिकाका किसानले उत्पादन बेच्न बजारका घर–पसल धाउनु नपर्ने भएको छ । नगरपालिकाको कार्यालयले किसानका उत्पादन खरिद गर्न थालेपछि यस्तो बाध्यता हटेको हो ।
कृषि क्षेत्रको विकासलाई पहिलो प्राथमिकतामा राखेको नगरले खेतीमा किसानलाई आकर्षित गर्न उनीहरुका उत्पादन आफैँ खरिद गर्न थालेको हो । सदरमुकाम चौताराको मुख्य बजारमा तरकारी संकलन तथा चिस्यान केन्द्र सञ्चालनमा ल्याएर नगरले दुई सातादेखि किसानका उत्पादन खरिद गरिरहेको छ ।
संकलित तरकारी यही केन्द्रबाट बिक्री हुने गरेको छ । बजारमा खपत हुन नसकेको तरकारी राजधानी लगेर बेच्ने व्यवस्था नगरपालिकाले मिलाएको छ । बजार खोज्नु पर्ने बाध्यता हटेपछि स्थानीय किसान उत्साहित भएका छन् । यसअघि तरकारी बोकेर बजारका घर–पसल धाउनु पर्ने बाध्यता थियो । त्यति गर्दा पनि सबै तरकारी बिक्री नहुँदा सस्तोमा छोड्नु पर्ने या घरमै फर्काउनु पर्ने अवस्था थियो ।
नगर प्रमुख कृष्णप्रसाद सापकोटा कृषिलाई व्यवसायिक बनाउन किसानमा उर्जा भर्ने उद्देश्यले उनीहरुको उत्पादनको बजारीकणको जिम्मेवारी नगरपालिकाले लिएको बताउँछन् । ‘कृषिलाई व्यवसायिकतासँग जोड्न सके मात्र नगरवासीको जीवन उत्थान हुन्छ भन्ने मान्यता नगरले लिएको छ,’ उनले भने । तरकारीमा नगरपालिकालाई आत्मनिर्भर बनाउने लक्ष्य रहेको प्रमुख सापकोटा बताउँछन् ।
नगरले किसानका तरकारीजन्य सबै उत्पादन खरिद गरिरहेको छ । अहिले नगरको केन्द्रमा गोलभेँडा, साग, सिमी, कांक्रो, फर्सी, खुर्सानी, करेला, घिरौँला लगायत मौसमी उत्पादन संकलन भइरहेको छ । किसानसँग खरिद गरेको तरकारीको भूक्तानी हरेक १५ दिनमा दिने व्यवस्था नगरले गरेको छ । नगरले किसानको बैँक खातामा सिधै रकम जम्मा गरेर भूक्तानी गर्दै आएको छ । बजारमा चलेको भाउ किसानले पाउने नगरले जनाएको छ ।
तरकारी बिक्रीको लागि नगरको संकलन केन्द्रमा आउने किसानको संख्या दिनदिनै बढिरहेको केन्द्र सञ्चालनको जिम्मेवारी पाएका कृष्णबहादुर श्रेष्ठले जानकारी दिए । उनका अनुसार सिजन भएकाले अहिले धेरै मात्रामा संकलन भइरहेको छ । ‘दिनमै २ सय केजीसम्म गोलभेँडा संकलन हुन्छ । यहाँ खपत हुन नसकेको गोलभेँडा कालिमाटी लगेर बेच्छौँ,’ उनले भने ।
अन्यत्र बजार नपाएर किसानले गोलभेँडा फालिरहँदा यहाँका किसानले भने सहजै बजार र मूल्य पाइरहेका छन् । ४० केजीबाट सञ्चालनमा आएको केन्द्रमा अहिले गोलभेँडाबाहेक अन्य तरकारी नै दैनिक १ सय किलोसम्म संकलन भइरहेको छ । नगरको चौतारा गैह्रीगाउँ, कुविण्डे, कल्लेरी, डडुवा लगायत क्षेत्र मौसमी÷बेमौसमी तरकारी उत्पादनको लागि चर्चित छन् ।
कुविण्डेको आलु र दूध यहाँको ब्राण्ड नाम हो । त्यस्तै काउली, गोलभेँडा, मुला, साग, खुर्सानी लगायत उत्पादनमा नगर अग्रणी छ । नगरको मौसमी लेकाली निउरो र डल्ले मुलाको स्वाद सेना, प्रहरी, कर्मचारी र उनीहरुको परिवारको जिब्रोमा झुण्डिएको छ । नगरपालिकाले किसानका उत्पादन खरिद गर्न थालेपछि तरकारीको व्यवसायिक खेती बढ्नेमा नगर ढुक्क छ ।
नगर प्रमुख सापकोटा आफैँमा किसान हुन् । कुविण्डेका उनी बिगतमा उनी आलु खेती गर्थे । २०७९ को स्थानीय निर्वाचनमार्फत उनी नगरपालिकाको नेतृत्वमा आएपछि नगरले कृषि क्षेत्रलाई पहिलो प्राथमिकतामा राखेर कार्यक्रम बनाउँदै आएको छ । दोस्रो कार्यकालमा कृषि क्षेत्रको बजेट अझै बढाउने तयारीमा प्रमुख सापकोटा जुटेका छन् ।
नगरले कृषि उत्पादनमा कृषकलाई उत्साही बनाउँदै संकलन केन्द्र थप व्यवस्थित बनाउन चौतारा साँगाचोकगढी नगरपालिका–४ कुविण्डेमा चिस्यान केन्द्र निर्माण गरिरहेको छ । नगरको २ करोड र संघीय सरकारको ५० लाख अनुदानमा निर्माण भइरहेको यो केन्द्रलाई नगरले आफ्नो गौरवको आयोजनाको रुपमा लिएको छ । चिस्यान केन्द्र आगामी माघसम्म सम्पन्न भएर सञ्चालनमा आउने नगरले जनाएको छ । छिट्टै नै नगरले कृषि एम्बुलेन्सको व्यवस्था गर्न लागेको प्रमुख सापकोटाले जानकारी दिए ।
प्रतिक्रिया
