मेलम्ची नगरपालिकाको बजेट पौने दुई अर्व

मेलम्ची–मेलम्ची नगरपालिकाले आगामी आर्थिक वर्षको लागि पौने दुई अर्र्व बजेट विनियोजन गरेको छ ।

मेलम्ची नगरपालिकाको नगरसभाको १६ औं अधिवेशनबाट आर्थिक वर्ष २०८१÷०८२ का लागि १ अर्ब ७६ करोड ८४ लाख ५९ हजार रुपैयाँको बजेट सार्वजनिक गरेको हो ।

नगरपालिकाले पूर्वाधार विकासमा विशेष जोड दिंदै बजेट विनियोजन गरेको नगरप्रमुख आइतमान तामाङले बताए । ‘चालु आर्थिक वर्षमा भएका उपलव्धिलाई आधार मानेर बजेट विनियोजन गरिएको छ’, नगर प्रमुख तामाङले भने, ‘माग र आबश्यकतालाई मध्यनजर गर्दै अत्यावश्यक क्षेत्रमा बजेट छुट्याएका छौं ।’ नगरपालिकाले प्राथमिकताका आधारमा पूर्वाधारपछि शिक्षा, स्वास्थ्य, कृषि, पर्यटन तथा संस्कृति र सम्पदा संरक्षणमा पनि बजेट विनियोजन गरेको छ ।

गत आर्थिक वर्षदेखि विद्यालयमा सुरु गरिएको छ देखि १० कक्षा सम्मका विद्यार्थीका लागि दिवा खाजा कार्यक्रमलाई निरन्तरता दिएको छ । उत्पादन र परिणाम देखिने ढंगले बजेट विनियोजन गरिएको नगरपालिकाका प्रवक्ता राजु रायमाझीले जानकारी दिए ।

आधुनिक र परम्परागत कृषि प्रणालीलाई आपसमा जोड्ने उद्देश्यले कृषि उपकरणसँगै गोरु पाल्ने किसानलाई प्रोत्साहन गर्न अनुदानको व्यवस्था गरिएको नगरले जनाएको छ । अध्ययन गर्ने उमेरका सबैलाई शिक्षाको पहुँचमा पु¥याउन छोरी बुहारी र विपन्न तथा जेहेन्दार छात्र छात्रालाई उच्च शिक्षा अध्ययनका लागि छात्रवृत्तिको व्यवस्था गरिएको बजेट वक्तव्य जारी गर्दै उपप्रमुख उमा प्रधानले बताईन् ।

अधिवेशनले नगर प्रमुख तामाङले प्रस्तुत गरेको नीति तथा कार्यक्रम तथा उपप्रमुख प्रधानले पेस गरेको बजेट तथा विनियोजन विद्येयक सर्वसम्मतले पास गरेको थियो । अधिवेशनमा आर्थिक समिति सदस्य किरणदीप खड्काले पेस गरेको कृषि तथा पशुपन्छि सम्वन्धि विद्येयकसमेत पारित गरेको थियो ।