काठमाडाैँ । अशोक थापा मगरको निर्देशन रहेको फिल्म ‘जलाकी’ को ट्रेलर सार्वजनिक भएको छ।

निर्माण टोलीले शुक्रबार लबिम मलको क्यूएफएक्स हलमा कार्यक्रम गर्दै ‘ट्रेलर सार्वजनिक गरेको हो। ट्रेलरमा कलेज जीवनको प्रेमकथा र समयको परिवर्तनसँगै पात्रहरूको जीवनमा आउने भावनात्मक उतारचढावलाई कलात्मक रूपमा प्रस्तुत गरिएको छ।

ट्रेलरमा अभिनेत्री उपासना सिंह ठकुरीको अभिनय र अभिनेता सोनम तोप्देनसँगको उनको केमेस्ट्री सुहाएको देखिन्छ। मगर समुदायको सांस्कृतिक पहिचानसँग सम्बन्धित सिनेमाको कथा र यसअघि नै चर्चित भइसकेका गीतहरूले ट्रेलरको थप आकर्षित बनाएको छ।

सिनेमामा समावेश ‘कलेजीको छेऊ’, ‘चाँदी जलप’ र ‘जाले रुमाल मायालाई’ बोलको तीन गीत र टिजरलाई दर्शकले निकै रुचाएका छन्। ट्रेलरलाई पनि दर्शकले रुचाउने निर्माण टिमको विश्वास छ।

‘जलाकी’ मगर समुदायमा आस्था, सम्झना र मायाको प्रतीकका रूपमा चिनिने ढुङ्गाले बनाइएको स्तम्भलाई जनाउने शब्द हो। निर्देशक मगरले यही सांस्कृतिक प्रतीकलाई केन्द्रमा राखेर मगर र गुरुङ समुदायको संस्कृति, परम्परा र भावना समेटिएको कथा सिनेमामा प्रस्तुत गरिएको बताए।

सिनेमामा उपासना सिंह ठकुरी, सोनम तोप्देन, शिल्पा मास्के, माओत्से गरुङ, बुद्धि तामाङ, अस्तित्व भट्टचन, साहारा हाङमा लिम्बू, रजनी गरुङ, राजु रेग्मी मगर, उषा खड्की, खड्कबहादुर पुन (खबपु), लुनिभा तुलाधर, संगीता थापा, कर्मा लामा तामाङ, भावना मगर, राज काउचा मगर, दुइसाङ थिन र विशेष भूमिकामा क्याप्टेन विजय लामा तथा बालकलाकारमा मुन्जन थापा मगर, नुलाम्मा बान्तावा, रिन्सी धनहा मगरले अभिनय गरेका छन्।

यो सिनेमाबाट मिस सिक्किमकी साहारा हाङमा लिम्बूले नेपाली रजतपटमा डेब्यु गरेकी छन्। यो फिल्म मंसीर ४ गतेबाट प्रदर्शन हुँदै छ।