करण रावल बने चौथो लिस्तिकोट–दुगुनागढी माउन्टेन ट्रेलरेस प्रतियोगिताको च्याम्पियन

तातोपानी–नेपाली सेनाका धावक करण रावल चौथो लिस्तिकोट–दुगुनागढी माउन्टेन ट्रेलरेस प्रतियोगिताको च्याम्पियन बनेका छन् ।

शनिबार सम्पन्न प्रतियोगितामा झण्डै साढे २ सय प्रतिस्पर्धीलाई उछिन्दै त्रिभुवन आर्मी क्लवका खेलाडी उनी खुला विधातर्फ बिजेता बनेका हुन् । साढे २४ किलोमिटर लामो ट्रेलरेस २ घण्टा १३ मिनेट ५१ सेकेण्डमा पुरा गर्दै रावलले नगद १ लाख १० हजार रुपैयाँ पुरस्कार जिते ।

सेनाकै गोपाल तामाङ दोस्रो भए । निर्धारित दुरीको दौड २ घण्टा १५ मिनेट ५८ सेकेण्डमा पार गरेर उनले ७५ हजार रुपैयाँ पुरस्कार पाए । तेस्रो बनेर ५५ हजार रुपैयाँ पुरस्कार जितेका धावक बेदबहादुर सुनारले २ घण्टा १० मिनेट २ सेकेण्डमा दौड पार गरेका थिए । उनी पनि सेनाकै धावक हुन् ।

खुलातर्फ नै ताप्लेजुङका रमेश लिम्बु तेस्रो, सेनाका मोहन जोसी पाँचौँ र गोविन्द कार्की छैठौँ भए । उनीहरुले क्रमशः ४०, ३० र २० हजार रुपैयाँ पुरस्कार हात पारे ।

महिला विधातर्फ साविक बिजेता खोटाङकी प्रिया राई च्याम्पियन भइन् । २ घण्टा ५७ सेकेण्डमा दौड पुरा गरेकी उनले नगद ६० हजार रुपैयाँ पुरस्कार जितिन् । उनी तेस्रो संस्करणमा पनि च्याम्पियन बनेकी थिइन् । धावक रसिला तामाङ दोस्रो र हुमी बुढामगर तेस्रो भए । उनीहरुले क्रमशः ३५ र २० हजार रुपैयाँ नगद पुरस्कार प्राप्त गरे ।

सिन्धुपाल्चोक जिल्ला विधातर्फ पाँचपोखरी थाङपाल गाउँपालिकाका लाक्पा तामाङ पहिलो, ङेमा तामाङ दोस्रो र मेलम्ची नगरपालिकाका राजेन्द्र तामाङ तेस्रो भए । उनीहरुले क्रमशः ३०, २० र १५ हजार रुपैयाँ पुरस्कार जिते ।

चार बिधामा प्रतिस्पर्धा गराइएको प्रतियोगिताको स्थानीयतर्फको दौडमा भोटेकोसी गाउँपालिकाका जाङ्बो शेर्पा, कुमा तामाङ र निमाछिरिङ तामाङ प्रथम, द्धितीय र तृतीय भए । उनीहरुले ३०, २० र १० हजार रुपैयाँ नगद पुरस्कार क्रमशः हात पारे ।

बिजेता धावक तथा धाविकाहरुलाई कार्यक्रमका प्रमुख अतिथि उपत्यका पृतनाका पृतनापति उपरथि सागरबहादुर थापा, प्रमुख जिल्ला अधिकारी झक्कप्रसाद आचार्य, इन्द्रध्वज गणका गणपति प्रमुख सेनानी धर्मेन्द्र भण्डारी लगायतले नगद, ट्रफी, मेडल र प्रमाणपत्र वितरण गरेका थिए ।

भोटेकोसी गाउँपालिकाको प्रायोजनमा नेपाली सेनाले चार वर्षदेखि लगातार यो प्रतियोगिता आयोजना गर्दै आएको छ । यो पटक चौतारास्थित इन्द्रध्वज गणले प्रतियोगिताको आयोजना गरेको थियो ।

तिब्बतसँगको युद्धकिल्ला दुगुनागढीको संरक्षण र प्रचार गर्ने उद्देश्यले आयोजना गरिएको ट्रेलरेस तातोपानीस्थित सुख्खा बन्दरगाह भन्सारबाट सुरु भएर नयाँ पुल, पाङलाङ, लिस्तिकोट हुँदै २ हजार ४ सय २५ मिटर उचाइको गुम्बा पुगेर सिल्दुम, धारापानी गोदाम भएर २ हजार १ सय २२ मिटर उचाइको दुगुनागढी आएर सम्मन्न भएको थियो ।

लिस्तिकोट दुगुनागढी माउन्टेन ट्रेलरेसको चौथो संस्करण फागुनमा