मेलम्चीले शिक्षा क्षेत्रमा पर्याप्त बजेट छुट्याएको छ–प्रमुख तामाङ
सातकन्या माविको ५१ औँ वार्षिकोत्सब
मेलम्ची-मेलम्ची नगरपालिकाका प्रमुख आइतमान तामाङले शैक्षिक क्षेत्रको सुधारका लागि नगरपालिकाले आबश्यक बजेट विनियोजन गरेको बताएका छन् ।
मेलम्ची नगरपालिका, वडा नं. ९ स्थित सातकन्या माविको ५१ औँ वार्षिकोत्सब समारोहमा बोल्दै प्रमुख अतिथि तामाङले सबै विकासको प्रमुख आधार शिक्षा भएकाले नगरले शिक्षा क्षेत्रमा पर्याप्त बजेट विनियोजन गरेको बताएका हुन् ।
विद्यालयको शिक्षाको अबस्था सुधारको लागि अभिभावकले पनि चासो लिनु पर्ने तामाङले बताए । उनले विद्यालयममा कला, संस्कृतिको विकासका लागि प्रशिक्षण दिने व्यवस्था गर्न लागेको जानकारी दिए । नगरले नृत्य र खेलको प्रशिक्षक नियुक्त गर्न लागेको जानकारी दिएका हुन् ।
उपप्रमुख उमा प्रधानले सामुदायिक विद्यालयको शैक्षिक सुधारका लागि सबै पक्ष लागिपर्नु पर्ने बताइन् । कार्यक्रममा नेपाली कांग्रेसका महाधिवेशन प्रतिनिधि विकास तामाङले द्वैध प्रकृतिको शिक्षा पद्धतिले सामुदायिक विद्यालय मध्यम र निम्न वर्गका बाल वालिका पढ्ने स्थल भएकाले सामुदायिक विद्यालयको विकासमा राज्यले विशेष ध्यान दिनुपर्ने बताए ।
प्रधानाध्यापक जनक अधिकारीले प्रगति प्रतिवेदन प्रश्तुत गरेको कार्यक्रममा मेलम्ची नगरपालिका वडा नं. ९ र १० का वडाअध्यक्षहरु किरणदिप खड्का र अमृत खनाल, इन्द्रावती क्याम्पसका अध्यक्ष सिपी दुलाल, क्याम्पस प्रमुख राधाकृष्ण श्रेष्ठ, याङ्री लार्के सरोकार समितिका सचिव चन्द्रबहादुर तामाङ लगायतले विद्यालयको शैक्षिक र भौतिक प्रगतिको कामना गरेका थिए । विद्यालय व्यवस्थापन समितिका अध्यक्ष सुनबहादुर घलेले विद्यालयमा कक्षाकोठा अपुग भएकाले त्यसका लागि पहल गर्न स्थानीय सरकार प्रमुखसँग आग्रह गरे ।
