इन्द्रेश्वरी माविले मनायाे स्वर्ण जयन्ती
मेलम्ची–मेलम्ची नगर प्रमुख आइतमान तामाङले प्राविधिक शिक्षामा सबैकाे पहुँच पुगाेस भन्ने उद्देश्यले सिभिल इन्जिनियरिङ र कृषि प्राविधिक अध्ययन गर्नेहरूलाई छात्रवृत्तिको व्यवस्था गरिएकाे बताएका छन् ।
इन्द्रेश्वरी मावि मेलम्चीको स्वर्ण जयन्ती समाराेहकाे उद्घाटन गर्दै प्रमुख तामाङले प्राविधिक शिक्षा आफैमा स्वराेजगारमूलक भएकाले नगरले बिपन्न वर्गका विद्यार्थी पनि प्राविधिक शिक्षा अध्ययन गरून् भन्ने उद्देश्यले छात्रवृत्तिकाे व्यवस्था गरेकाे बताए ।
उनले शैक्षिक क्षेत्रकाे विकासले समग्र नगरकाे विकासमा सघाउ पुग्ने भएकाले शैक्षिक क्षेत्रमा लगानी गर्न नगरले कुनै कञ्जुस्याइ नगर्ने बताए ।
कार्यक्रममा बागमती प्रदेश सरकारकी पूर्व राज्यमन्त्री इन्द्रमाया गुरुङले नगरकाे केन्द्रमा रहेकाे विद्यालय भएकाले इन्द्रेश्वरीले सिंगाे नगरकाे नेतृत्व गर्ने विद्यालय बन्नु पर्ने बताइन् ।
नगर उपप्रमुख उमा प्रधानले शिक्षाको विकास विना अन्य विकास सम्भव नभएकोले शैक्षिक क्षेत्रकाे विकासमा ध्यान दिनु पर्ने बताएकी थिइन् ।
स्वर्ण जयन्तीकाे अवसरमा इन्द्रेश्वरी एसएलसी व्याज २०५९ ले निर्माण गरेकाे स्वर्ण स्मारककाे अनावरण गर्नुका साथै विभिन्न अक्षयकोषदाताले स्थापना गरेकाे छात्रवृत्ति वितरण गरिएकाे थियाे ।
२०५९ सालका एसएलसी व्याजका विद्यार्थीले आफूलाई अध्यापन गराउने शिक्षकलाई कार्यक्रममा सम्मान गरेका थिए ।
हुत्तराज अर्ध चन्द्र पाण्डे पत्रकारिता पुरस्कारबाट यस वर्ष पत्रकारहरु सागर खड्का र चित्र मिजारलाई पुरस्कृत गरिएकाे थियाे ।
विद्यालयका प्रधानाध्यापक देवी श्रेष्ठले प्रगति प्रतिवेदन प्रश्तुत गरेकाे कार्यक्रम विद्यालय व्यवस्थापन समितिका कार्यवाहक अध्यक्ष बिदुर सापकोटाको सभापतित्वमा सम्पन्न भएकाे थियाे ,