चौतारा नगरको बजेट एक अर्व २६ कराेड
बजेटमा शिक्षा, युवा तथा खेलकुद, पूर्वाधार विकास, कृषि, पशु र स्वास्थ्य सेवालाई सबैभन्दा बढी प्राथमिकता दिइएको छ ।
चौतारा–चौतारा साँगाचोकगढी नगरपालिकाले आगामी आर्थिक वर्षको लागि सवा एक अर्व रुपैयाँभन्दा बढीको बजेट ल्याएको छ ।
नगरले आर्थिक वर्ष ०८१/८२ को लागि एक अर्व २६ करोड ११ लाख ६१ हजार ६ सय ६१ रुपैयाँको बजेट सार्वजनिक गरेको हो । नगरले बुधबार सार्वजनिक गरेको बजेटमा आठ प्राथमिकताका क्षेत्रमा बजेट विनियोजन गरेको छ ।
बजेटमा शिक्षा, युवा तथा खेलकुद, पूर्वाधार विकास, कृषि, पशु र स्वास्थ्य सेवालाई सबैभन्दा बढी प्राथमिकता दिइएको छ ।
संघ सशर्त अनुदानतर्फ ४८ करोड ५९ लाख १३ हजार, संघ विशेष अनुदानतर्फ ८० लाख र संघ समानिकरण अनुदानतर्फ १८ करोड, ५१ लाख रुपैयाँ प्राप्त हुने बजेटमा उल्लेख छ ।
त्यस्तै प्रदेश समानकिरण अनुदानतर्फ २ करोड २ लाख ९३ हजार, प्रदेश सशर्त अनुदानतर्फ २ करोड, ४९ लाख१५ हजार, प्रदेश समपूरक अनुदानतर्फ ६ करोड र प्रदेश विषेश अनुदानतर्फ ७० लाख रुपैयाँ बजेट प्राप्त हुने जनाइएको छ ।
बजेटमा उल्लेख भएअनुसार स्वास्थ्यमा २ करोड, शिक्षा, युवा तथा खेलकुदमा ६ करोड ४० लाख, कृषि सेवातर्फ २ करोड ५० लाख, पशु सेवामा १ करोड ५० लाख रुपैयाँ छुट्याइएको छ ।
पूर्वाधार विकासमा ५ करोड, वन, वातावरण तथा विपद् व्यवस्थापनमा ७५ लाख, सहकारीतर्फ १० लाख र लघु उद्यमतर्फ २५ लाख रुपैयाँ विनियोजन गरिएको बजेट बक्तव्यमा जनाइएको छ । अन्य शीर्षकमा २२ योजनालाई बजेट विनियोजन गरिएको छ ।
संघ राजस्व बाँडफाँडबाट १३ करोड, प्रदेश राजस्व बाँडफाँडबाट ११ करोड ७० लाख, आन्तरिक स्रोत दहत्तरबहत्तरबाट १८ करोड ५० लाख, घरजग्गा रजिष्टेशनबाट ७८ लाख र नगर तथा वडाको आन्तरिक आयबाट २ करोड रुपैयाँ आम्दानी हुने प्रक्षेपण गरिएको छ ।
