चौतारा नगरको बजेट सार्वजनिकीकरण कार्यक्रममा हात हालाहाल, बर्सिए मुक्का
चौतारा–चौतारा साँगाचोकगढी नगरपालिकाको बजेट सार्वजनिक गर्ने कार्यक्रममा जनप्रतिनिधिबीच झडप भएको छ ।
एमाले–कांग्रेस र माओवादी समर्थित जनप्रतिनिधि दुई पक्षमा बाँडिएर झडपमा उत्रिएका हुन् ।
ढिलो गरी सुरु कार्यक्रममा नगरप्रमुख कृष्णप्रसाद सापकोटाले धारणा राख्न सुरु गर्नासाथ एमाले–कांग्रेस समर्थित जनप्रतिनिधि नारावाजीमा उत्रिए ।
उनीहरुले माइक खोस्ने, स्पीकर भूँईमा बजार्ने लगायत गतिविधि गर्न थालेपछि माओवादीका जनप्रतिनिधि प्रतिवादमा उत्रिएका थिए । यत्तिकैमा दुई पक्ष मुठभेडमा उत्रिए । उनीहरुबीच धकेला धकेल, हात हालाहाल भयो । मुक्का बर्सिए ।
स्थिति नियन्त्रणमा लिन सुरक्षाकर्मी नै परिचालन गर्नु गरेको थियो । प्रहरीले स्थिति नियन्त्रणमा लिएपछि नगरप्रमुख सापकोटाले आर्थिक वर्ष २०८१÷८२ को बजेट र केही कार्यविधि सभामा प्रस्तुत गरेका थिए । नारावाजीकै बीच सापकोटाले बजेट र कार्यविधि बहुमतद्धारा पारित भएको घोषणा गरे । बहुमत संख्यामा रहेका माओवादी समर्थित जनप्रतिनिधिले ताली बजाएर पारित गरेका थिए ।
नगरमा माओवादीले एकलौटी गरेको आरोप लगाउँदै एमाले–कांग्रेसले केही समयदेखि असन्तुष्टि जनाउँदै आएका थिए । केही साताअघि भएको नगरसभामा भएको भद्र सहमति बजेटमा नसमेटिएको उनीहरुको भनाईँ थियो ।
सम्वन्धित समाचार
चौतारा नगरको बजेट एक अर्व २६ कराेड
