अवरुद्ध पाँचपोखरी जोड्ने सडक सुचारु हुँदै
गत असार १ गते र त्यसपछि आएको बाढी र पहिरोका कारण कटान हुँदा मेलम्ची–तिपेनी–भोताङ सडक ठाउँ ठाउँमा अवरुद्ध छ । सडक अवरुद्ध हुँदा मेलम्ची हुँदै पाँचपोखरी जाने यात्रुहरुलाई असुविधा हुने भएकाले तत्काल ट्रयाक खोलेर आवागमन सहज बनाउन लागिएको मेलम्ची नगर प्रमुख आइतमान तामाङले बताए ।
मेलम्ची–जिल्लाकै प्रख्यात तीर्थस्थल पाँचपोखरीमा जनै पुर्णिमाको अवसरमा लाग्ने मेलामा आउने तीर्थयात्रीलाई सहज बनाउने उद्देश्यले मेलम्ची नगरपालिकाले अवरुद्ध मेलम्ची–तिपेनी सडक सुचारु गराउन थालेको छ ।
मेलामा आउने यात्रुले समस्या भोग्नु नपरोस भन्नुका साथै पाँचपोखरी थाङ्पाल गाउँपालिकाका बासिन्दालाई समेत आवागमनमा सहज बनाउन झण्डै दुई महिनादेखि अवरुद्ध सडक सुचारु गराउन लागिएको हो ।
गत असार १ गते र त्यसपछि आएको बाढी र पहिरोका कारण कटान हुँदा मेलम्ची–तिपेनी–भोताङ सडक ठाउँ ठाउँमा अवरुद्ध छ । सडक अवरुद्ध हुँदा मेलम्ची हुँदै पाँचपोखरी जाने यात्रुहरुलाई असुविधा हुने भएकाले तत्काल ट्रयाक खोलेर आवागमन सहज बनाउन लागिएको मेलम्ची नगर प्रमुख आइतमान तामाङले बताए ।
पहिरोले कटान गरेको सडक सुचारु गराउन पहिरो गएको स्थान मेलम्ची–९ स्थित मकैबारी पुगेर प्रमुख तामाङले यथाशीघ्र मेलम्चीबाट खाल्डे खोलासम्मको सडक सुचारु गराउन निर्देशन दिएका छन् । यसअघि नगरपालिकाले मेलम्चीबाट पाँचपोखरी जोड्ने मुख्य सडक अवरुद्ध भएपछि मेलम्ची, ज्यामिरे, सुनखानी, रातमाटा, खाल्डेखोला सडक मर्मत गरी पाँचपोखरी थाङ्पाल आवतजावत गर्ने बैकल्पिक मार्ग निर्माण गरेको थियो ।
पाँचपोखरी जान बैकल्पिक मार्गबाट पनि समस्या आएपछि मेलम्चीदेखि खाल्डे खोलासम्मको सडक मर्मत गरी यातायात सुचारु गराउन लागिएको प्रमुख तामाङले बताए । सडक मर्मतका लागि प्रमुख तामाङ, उपप्रमुख उमा प्रधान प्राविधिकसहितको टोली लिएर पहिरोस्थल पुगेका थिए । यसअघि पनि पाँचपोखरी थाङ्पाल गाउँपालिकाको आग्रहमा स्थलगत अवलोकनपछि प्रमुख तामाङले बैकल्पिक मार्ग मर्मत गर्न निर्देशन दिएका थिए ।
खाल्डे खोलासम्म सडक सहज भएपछि यात्रुले लाँगर्चे हुँदै आवतजावत गर्न पाउँनेछन् । मेलम्ची–तिपेनीसँगै राजधानीबाट सिन्धुपाल्चोकको पश्चिमी भाग जोड्ने सबैभन्दा छोटो दुरीको साँखु–फट्केश्वर सडकमा पनि नगरपालिकाले मर्मत सम्भार सुरु गरेको छ । वर्षातले सडक ठाउँ–ठाउँमा खोलेको र सडक हिलो भएकाले सडक मर्मत गर्न लागिएको हो ।
मेलम्ची नगरपालिका क्षेत्रसँगै काठमाडौँको शंकरापुर नगरपालिका क्षेत्रको केही भू–भागमा वर्षात्का कारण सडक बिग्रिएपछि मर्मत गर्न लागिएको नगरपालिकाले जनाएको छ । यो सडक सहज हुँदा मेलम्ची नगरपालिका, हेलम्बु, पाँचपोखरी थाङ्पाल, इन्द्रावती गाउँपालिकासँगै सदरमुकाम चौतारा र काभ्रेको मन्डन देउपुरका बासिन्दाले समेत राजधानीबाट छोटो दुरीमा आवागमन गर्न सक्नेछन् ।