बलात्कार मुद्दामा क्रिकेटर सन्दिपलाई आठ वर्ष कैद सजाय

काठमाडाैँ-बलात्कार मुद्दामा दोषी ठहर भएका क्रिकेटर सन्दिप लामिछानेलाई ८ वर्ष कैद र ५ लाख रुपैयाँ जरिवानाको सजायको फैसला भएको छ ।

काठमाडौं जिल्ला अदालतका न्यायाधीश शिशिरराज ढकालको इजलासले सन्दीपलाई उक्त कैद र जरिवानाको सजाय सुनाएको हो । अदालतले साताअघि उनलाई दोषी ठहर गरेको थियो ।

सन्दीपलाई तीन लाख जरिवाना र २ लाख युवतीलाई आर्थिक क्षतिपुर्ती गरि कुल ५ लाख पनि तोकिएकोछ ।

गतवर्ष भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो । भदौ २१ गते एक नाबालिगले सन्दीपले आफूलाई पटक पटक बलात्कार गरेको भन्दै प्रहरी वृत गौशालामा किटानी जाहेरी दिएकी थिइन ।

सन्दीपलाई पुष २८ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न आदेश दिएको थियो ।

सजाय पाए पनि क्रिकेटर सन्दीप लामिछानेले तत्काल कारागार (जेल)मा बस्नु नपर्ने भएको छ ।

१० वर्षभन्दा कमको सजाय बाहिरै बसेर लड्न पाउने कानूनी व्यवस्थासँगै सन्दीपलाई कारागार चलान गर्नु नपर्ने भएको काठमाडौं जिल्ला अदालतले जनाएको छ ।

सजायप्रति असन्तुष्ट सन्दिप तत्काल उच्च अदालतमा पुनरावेदन लिएर जाने उनका वकिलले जनाएका छन् ।