चौतारा नगर लगातार चौथो पटक राष्ट्रपति रनिङ शिल्ड च्याम्पियन

चौतारा–सिन्धुपाल्चोक जिल्ला स्तरीय राष्ट्रपति रनिङ शिल्ड प्रतियोगितामा चौतारा साँगाचोकगढी नगरपालिका लगातार चौथो पटक च्याम्पियन बनेको छ ।

आइतबार सदरमुकाम चौतारामा सम्पन्न १० औँ राष्ट्रपति रनिङ शिल्ड फेरि चौताराले जितेको हो । यसअघि लगातार तीन पटक रनिङ शिल्ड जितेर चौताराले उपाधि कब्जा गरेको थियो ।

लगातार चौथो पटक च्याम्पियन हुने क्रममा चौताराले यस पटक ४१ स्वर्ण , ११ रजत र १२ कास्य पदक बटुल्यो ।

सुनकोसी गाउँपालिकाका उपबिजेता बन्यो । उसले ७ स्वर्ण, २ रजत र ५ कास्य हात पार्यो ।

प्रतियोगितामा तेस्रो बनेको मेलम्ची नगरपालिकाले ६ स्वर्ण २ रजत र ८ कास्य जम्मा गर्यो ।

प्रतियोगिताको महत्वपूर्ण विधा भलिवल छात्रतर्फ मेलम्ची प्रथम र बाह्रविसे नगरपालिका दोस्रो भए । छात्रातर्फ मेलम्ची नै पहिलो हुँदा हेलम्बु दोस्रो बन्यो ।

तेक्वान्डोतर्फ चौतारा नगरपालिका, सुनकोसी र भोटेकोसी गाउँपालिका क्रमशः पहिलो, दोस्रो र तेस्रो भए ।

जिल्ला खेलकुद विकास समितिद्धारा तीन दिनसम्म सञ्चालित प्रतियोगिताको विजेता विद्यालय तथा विद्यार्थीलाई सिन्धुपाल्चोक क्षेत्र नंं १ का सांसद एवम् युवा नेता माधव सापकोटा सुबाेधले शिल्ड, ट्रफी, मेडललगायत पुरस्कार वितरण गरेका थिए ।