सडक सम्पर्कले जोडिए बाह्रविसे–तातोपानी
बाह्रविसे–अरनिको राजमार्गको बाह्रविसे–तातोपानी खण्ड बिहीबार सडक सम्पर्कले जोडिएको छ ।
भोटेकोसी नदीमा ह्युम पाइप राखेर टुटेको सडक सम्पर्क अस्थायी रुपमा जोडिएको हो । भारी वर्षाका कारण आएको बाढीले बाह्रविसे नगरपालिका–३ स्थित खागदलमा रहेको मोटरेवल पुल (बेलिब्रिज) सोमबार बगाएको थियो ।
चार दिनपछि अस्थायी संरचनाले टुटेको सडक सम्पर्क जोडिएपछि सवारी साधन चल्न थालेका छन् । बाह्रविसे नगरपालिकाको नेतृत्वमा सडक जोडिएको हो । नगरको स्रोत, साधन प्रयोग गरेर अस्थायी सडक संरचना बनाइएको नगर प्रमुख बालकृष्ण बस्नेतले बताए ।
ह्युम पाइको अस्थायी संरचना बनाउन सडक डिभिजन कार्यालय र सुरक्षा निकायले सघाएको बस्नेतले जनाए । बगाएको पुलका सामाग्री जुटाउन नेपाली सेनाले सहयोग गरेको थियो । ‘पछि काम लाग्न सक्ने ठानेर पुलका पार्टपूर्जा फुकालेर सुरक्षित राखेका हौँ,’ प्रमुख बस्नेतले भने ।
सडक सञ्चालनमा आएपछि तातोपानी भन्सार यार्ड र सडकमा अलपत्र परेका चिनियाँ सामाग्रीले भरिएका कन्टेनरसहित दर्जनौँ सवारी साधन पार भएका छन् । पुल बगाउँदा तातोपानी नाकाबाट हुने आर्थिक कारोवार प्रभावित हुन पुगेको थियो ।
