सुकुटेमा मंगलबारदेखि राष्ट्रिय विच भलिबल प्रतियोगिता हुँदै
सिन्धुपाल्चोक–खेलमार्फत पर्यटन प्रवद्र्धन गर्ने उद्देश्यले पर्यटकीय नगरी सुकुटेमा मंगलबारदेखि राष्ट्रियस्तरको विच भलिबल प्रतियोगिता सञ्चालन हुँदै छ ।
सिन्धुपाल्चोक भलिबल संघ र सिन्धु सुकुटे पर्यटन व्यवसायी संघको आयोजना एवम् व्यवस्थापन र नेपाल भलिबल संघको संयोजनमा हुने सातौँ महिला तथा आठौँ पुरुष राष्ट्रिय भलिबल प्रतियोगिताको तयारी पुरा भएको आयोजकले जनाएका छन् ।
प्रतियोगिताको माओवादी केन्द्रका अध्यक्ष पुष्पकमल दाहालले उद्घाटन गर्ने छन् । प्रतियोगिताको उद्घाटन गर्न उनी सोमबार अपराह्न सुकुटे आइपुगेका छन् ।
प्रतियोगिताको पूर्वसन्ध्यामा सदरमुकाम चौतारामा पत्रकार सम्मेलन गरी आयोजक सुकुटे पर्यटन व्यवसायी संघका सचिव कृष्णबहादुर सापकोटाले सबै तयारी सकिएको जानकारी दिएका थिए ।
प्रतियोगितामा सात प्रदेश तथा त्रिभुवन आर्मी, नेपाल प्रहरी र सशस्त्र प्रहरी बलका तीन विभागीयका ४० टोलीको सहभागिता रहने छ । प्रतियोगितामा महिलातर्फ २० र पुरुषतर्फ २० टोलीबीच प्रतिस्पर्धा हुने नेपाल भलिबल संघले जनाएको छ ।
प्रतियोगिताका दुबै बिजेता र उपबिजेताले क्रमशः ५० र २५ हजार रुपैयाँ पाउँदा तेस्रो र सान्त्वना हुने टोलीले १५ र १० हजार रुपैयाँका दरले नगद पुरस्कारसहित ट्रफी र मेडल पाउने छन् ।
नेपाल भलिबल संघकाअनुसार यो प्रतियोगिता आगामी वर्ष हुने अन्तर्राष्ट्रिय काभा भलिबल प्रतियोगिताको छनोटको रुपमा समेत रहने छ । सन् २०२५ मा सञ्चालन हुने सबैखाले अन्तर्राष्ट्रिय काभा भलिबल प्रतियोगितामा सुकुटेमा च्याम्पियन हुने महिला र पुरुषका टोलीलाई थप तालिम दिएर सहभागी गराउने संघको योजना छ ।
